
Jedno od takvih mjesta je i kanjon rijeke Sušice, brze planinske rijeke koja nastaje ispod vodopada Skakala. Kada proljetno sunce krene da topi snijegove sa okolnih planina, rijeka Sušica, tekući kroz svoj kanjon, daje život i jednom neobičnom jezeru, nazvanom po rijeci koja ga stvara – Sušičko jezero.

Svoju punu veličinu od 450 metara dužine, 250 metara širine i skoro 5 metara dubine, jezero dobije na proljeće, kada je vodotok Sušice najjači i kad jezero dobija najveću količinu vode.
Hladne i bistre vode istopljenih snijegova, svakog proljeća nanovo grade ovo jezero, jer tokom ljetnih mjeseci samo jezero, kao i rijeka koja ga napaja, potpuno presuše i nestanu, a na mjestu jezera ostane samo travnata livada, za koju slučajni prolaznik nikad ne bi pomislio da je, u stvari, jezero koje čeka novo proljeće.